懷孕9w

食野的胃口都仲係時好時差....

呢個WEEK, 係睇中醫最後一次

孕初期, 食埋呢幾劑藥就要靠我自己(因為醫師話我後生, 幫到我第10W)

醫師話幫左我打通晒氣血, 運行得好好

上星期去St paul 睇方醫生

見到Cheers, 心跳好似慢左d (13x下),
我聽d mama share 佢地個bb 係16x-18x....不過醫生話係range 之內, 唔駛太擔心,
同埋原來好似仔仔跳得慢d(聽到個下又覺得係仔都好~~)
不過見到佢個刻, 好細粒(1.83cm), 期待下次見佢快快長大呀!

佢的size 係比原本預產期細1日, 都叫足丫~叻叻!
(我無食太多長胎的東西....只係訓勁多, 牛正常食, 花膠間中飲)

方醫生特別係我左邊照, 就見到Cheers, 右邊就照下, 話我知個子宮正常

我有少少子宮向後屈, 但都係正常, 唔駛擔心

因為穩定了, 我都同左部份同事暗示我的喜訊

雖然都高估左一個同事把口...佢幫我傳開晒去...

不過.....都好多謝班同事好照顧我

唔俾粗重野我做, 同時有車接送我返工放工

出少左汗, 又唔駛咁辛苦

舒服好多

~~~

呢一排partner 放假20日, 我要坐佢位頂位, 變左workload 重左

忙左.....好少停落來....

不過都比我想像中無咁忙(我以為有好多鬼佬經理走來煩我添)

可能其他人都在忙la, 唔得閒來煩我

懷孕8w

2015.5.17

今日係星期日, 恨左好耐想食油膩野, 特別係想食薯餅(平日食的早餐一定係面包, 無其他選擇)

所以老公陪我去食麥記

陀住Cheers~我口味改變左, 重左口味( 以前我好清淡, 少食油膩盡量少甜少鹽)

依家....清淡就無胃口, 可能一來又要戒口, 好多人間美食都無得食

唯有食得ge...就揀d油膩, 令自己個口唔好咁淡.....

(其實油都唔好....怕bb 皮膚唔好, 但無計, 食得d 咩就要食, 否則我變左唔食野弊)

食完同老公搭車去澳門個邊行陣街

搭巴士個時, 居然有人讓座

可能我有d 寒背, 加上小肚腩, 跟住我老公係咁護住我

最終有人讓座

不過亦都証明, 澳門人係主動過香港人

(其實我自有左, 都少坐巴士....因為自搬左宿舍, 好好彩返工黏到同事車坐, 放工行20分鐘返宿舍^^)

仲有一樣野讚, 就係老公今朝烏低身, 拎鞋俾我著, 仲幫我拉鞋上的鍊

好感動呀~堂堂一個男人, 結婚個時肯當眾求婚, 當我有需要佢又唔介意咁樣幫我

~~~

2015.5.18

今日lunch 後....由4點....跟住6點.....嘩....不停肚餓

Cheers好肚餓下喎~~

食到就好la!!!我唔介意肥, 最緊要你健康, 知道嗎?

夜晚訓唔到左邊.....一側訓就紮到下邊好痛....上網聽人講左側訓最好

希望只係今晚, 唔好晚晚都訓唔到左邊la

~~~
2015.5.20
因為胃口好漂忽, 好似俾Cheers玩咁(正餐唔食, 食晒d 小食.....咁樣好易無營養ma
有一日.....我嬲起上來鬧左一句:衰仔
然後第二日早上, 居然8點都唔覺得肚餓, 平時係7點起身就要即刻食d 野
跟住我同老公講, 我地有d 驚!!(驚bb 有事)
一齊摸住個肚, 叫Cheers 乖, 媽mi 唔敢再話你, 你食咩, 只要你食得落, 媽mi 都俾你食, sorry....
講左好多野...
之後隔左一陣, 終於餓返

呼~~
真係唔知點解有時會咁? 好神奇, 佢好似已經有感覺, 知道你話佢, 佢就小器咁
個下真係嚇死, 但亦都係教罰我以後講野要小心, 要有耐性, Cheers 只係一個小朋友, 我要慢慢教佢

懷孕7w尾

2015.5.14

孕期要食好多Supplement....其實我買多左, 除左人人都話備孕前同頭3個月必食的葉酸

我仲買左鈣片和dha 魚油丸

不過呢.....食左幾日....發覺無得去廁所...

所以停左, 只係keep 住每日食葉酸

不過.....情況好似都麻麻, 明明日日有食生果, 食1份半生果....

去廁所都係唔多, 又唔暢通

最後昨天買左西梅干加益力多(好彩超巿有d 唔放落雪櫃的益力多)

琴晚食左飲左, 今朝再食西梅干.....掂呀!!

去到la!!!

我諗遲下要入貨

~~~

另一樣就係俾聰明的老公發現一樣野.....

唔知點解喎???

其實我一直都覺好辛苦,好多野唔食得.....

生冷野涼野一定要戒, 海鮮, 某d 生果, 大部份的菜.....戒晒

湯又唔飲得(因我搵醫師安胎, 佢怕我食錯飲錯, 情願我食d 穩陣又正氣的東西)

咁食到我口淡淡....覺得人生無意義(我一定係做唔到尼姑要守齋戒個d....)

那麼清淡的生活唔知幾時先過.....

不過呢....今日....食左細份量的撈面

居然返到公司2:30....又肚餓要食餅干

同老公講Cheers好好胃口

跟住佢竟然發現左.....哈哈

我其實日頭好胃口過夜晚!!

我老公真係超級留意我關心我~~要俾個like 佢!!!好爸bi~

~~~

2015.5.16

今日係星期六, 去左聯合上第1堂產前講座

點解咁早上? 因為我要夾時間....我係返長短周, 同埋係澳門返過來, 孕早期我又睇緊中醫安胎, 差唔多個個星期都要返來

咁一張船飛, 梗係要善用, 唔係ge 話, 只係返來睇一睇中醫就走人....好重皮呀

咁第一堂, 我學到係嬰兒護理

好彩我有個細我10年的妹妹, 個時佢出世我有份照顧佢

不過......就係無幫過佢沖涼, 我諗....我要學喇呢個

因為沖涼真係要好小心

上完堂去睇中醫, 因為到腰痛....

醫師幫我搞掂條腰

其實我唔係想咁依靠中醫

係因為我自己個人係澳門, 又係第1胎, 我真係唔想有咩事, 係澳門求救無助(澳門的醫療又麻麻)

情願自己每星期返一返香港, 俾中醫mon 住.....食野自己小心d

咁就唔駛擔心

見有d mama......又流啡又出血又孕吐....

見到都驚

但我依家係除左大食左, 易攰左, 易出汗左

同事暫時都未知我的事....(我覺得嘔係最易俾人發現你有左, 我仲要唔近office, 都幾大鑊, 好彩無嘔咋)

第1次政府產檢~ 7w2d

2015.5.12

今日請半日假, 要去將軍澳醫院做第1次產檢

因為早左返香港, 所以問下媽咪屋企有無飯開?無就一齊出去食, 跟住飲桑寄生茶

點知有d 餸尾, 咁返去食, 順便飲媽咪煲俾我的桑寄生茶

琴日我whatapps我媽咪, 佢知我今日返去做產檢同拎信件

佢就話想煲d 桑寄生茶俾我補下, 如果時間趕, 就拎去醫院俾我飲, 唔好走來走去

個下我真係想喊, 媽咪對我真係好

(我唔知桑寄生飲唔飲得, 想打俾醫師問下, 佢又唔聽電話, 但我諗我媽唔會害我ge, 

所以照飲!

事後醫師答左我可以飲, 不過唔可以多, 佢開俾我d 藥係已經有桑寄生, 同埋我上網搵過係安胎, 女士恩物來~)

食左野食埋桑寄生, 就去做產檢

好彩無叫老公請假陪我

原來政府第1次產檢係做普通野, 即度高磅重問病歷和抽血

無得照閃閃(BB 心跳).... (不過其實我都係一早知, 因為bk有mama  講過, 要照閃閃去私家, 政府多數聽心跳, 同埋我都算早期...)

助產士話之後有D CHECKING 會俾我睇到BB 同預計到幾多WEEK

但唔係今次,我估係唐氏期個時先有得照
政府預產期俾我係12月26....比原本去診所驗孕呢, 又早左一日, 都唔知佢地點計....
(聽好多人講之後仲有好多不同EDD, 不過唔爭得遠的話, 係政府生, 就跟政府的預產期)

mama group 好多mama 問我點解可以咁早去做檢查, 

其實我係4w知自己有, 就拿拿臨去排期

有好多mama 諗住唔急, 不過我就諗住搞掂左一樣唔駛煩, 你知LA....孕期咁多野煩咁多野做

不過早登記都好, 因為好多mama 到時就一齊擔心一齊係度諗bb 仲係唔係度?
(因為突然佢地有一日無作嘔又未去照BB....有D 仲要流啡.....個人係度胡思亂想.....)

咁為何不提早做產檢, 要估估下呢?
相反有D mama 又過份擔心.....我做2次產檢的時候, 佢地已經做左第3次....

好彩我下星期BOOK 左私家, 我仲叫定老公陪我, 我諗到時應該有閃閃睇喇卦~

上BK 好多JM SHARE 話跳得快就係代表BB 可能已經8-9W

初期照到閃閃, 係最貼近預產期

因為初時無食好多營養的東西, 正常生長, 之後可能又有好多人煲野俾你食, 又大食左, 個B 就會好唔同

預產期會有所改變

講返做產檢

將軍澳好方便 (G/F 繳費處登記, 但唔駛俾錢, 只係登記, 上2/F 等叫名)

去醫院登記, 就醫院做產檢, 生產就自動電腦TRANSFER 我資料去聯合, 唔駛媽媽自己走去排期

我係一知道有....第4W 就去醫院排期(其他區應該係去健康院排), 又預備好幾個私家婦科醫生電話號碼準備打

好好彩, 我BOOK 到心水, St paul 方醫生, 朋友介紹, 又有jm 睇緊, 價錢合理($455), 又係醫院, 聽講要等2個鐘先有得睇

但我係為左方便我上環上落船

琴日, 度高磅重.....磅重好似輕左2磅, 婚後其實我重左20磅, 依家反而輕左

呢一排食量唔算大

等再叫名入房前, 姑娘叫我坐去電視個邊聽野, 電視係播緊唐氏綜合症

等叫名, 原來係入房問病歷, 要出示返配偶身份証副本和自己身份証, 方便助產士入資料

跟住問我過往有咩大病, 有無藥物敏感, 有無做過婦科檢查, 今次bb係咪想要? 之前係用咩備孕?家中成員有無其他大病等等

問左一大輪, 助產士就俾左d 單張同關於聯合生的小冊子俾我,仲有下次覆診紙, 然後叫我自己落去抽血

跟住去1/F抽血....

成個產檢過程, 大約1個鐘

將軍澳醫院係新的日間大樓, 乜都新D, 乾淨D

所以我揀來醫院做, 好過去健康院

抽血, 第1次抽左6支

用來驗血型, 血色素, 有無地貧, Rh因子, 德國麻疹抗體, 乙型肝炎抗原,梅毒, 愛滋病

抽完個下....見暈

(平時我捐開血, 我都唔會咁...睇來今時唔同往日, 好在....我有帶水, 坐定定飲啖水, 止左血, 無事先再起行)

捐血結果, 其實我唔太擔心, 2月個時做婚檢驗過我係無事, 資料非常之update

不過抽完血, 返到澳門....

發覺我隻手....

其實我有捐開血的習慣, 我唔怕捐血打針

不過睇來護士手勢好差

我膠布無血, 証明我止好血先黏膠布(係自己用棉花按住, 見到止到血,先自己黏膠布, 跟住可自行離開)

途中我又無用力拎野

但回到澳門就咁ge 樣

我醒起.....我以前有一次捐血, 瘀得好勁

因為姑娘揀錯血管去吉落去抽血

唉....今次6小支, 我還頂得順(其實姑娘每轉一次針筒, 佢就郁一次...我估我係入邊有事, 俾姑娘撩左6野喎)

遇到咁ge 姑娘....我真係唔好彩

睇來下次再抽血又係咁....

~~~

P.S.

自係BK識左一班大家都係12月生BB 的mama.....

入左好多不同whatapps group,其實交換左好多情報, 不過原來都幾煩....

一人一句, 仲要係....突然有野想問, 你平時可能唔活躍去傾計, 無人睬你

跟住一係就過份擔心, 尤其bb 照唔到閃閃, 突然好痛好似作小產, 搞到自己都留意多左負面野

不過好彩我有睇中醫, 雖然好多人反對, 因為有人又話要作嘔嘔出來先好<--我覺得亂講一通

但睇中醫令我覺得安胎係重要, 因為始終第一胎, 自己唔知爭d 咩又唔知點先叫穩定

中醫幫你把住脈keep 住知你近況, 平安過到頭3個月, 咁就ok

我交晒d 擔心俾醫師, 其他野唔好諗lu

懷孕7w

2015.5.10
胃口時好時差....

上星期胃口麻麻, 前幾日又好返2日.....今日又差過

唉...好慘....

一包奶都飲唔落

但同同事出街食LUNCH 又要扮有胃口

因前排無胃口睇左醫生, 唯有扮仲未好返晒.....但都.....唔可以成日扮唔舒服

始終有一日會好....唉!!

右邊腋下呢幾日腫痛....好擔心自己有事

上網係BK 度問人....好多JM 話係乳線問題, 唔駛理它

問左中醫師都話係乳線問題, 等下星期產檢再問下醫生咩事

希望無事吧

依家舒服返D就好~~

希望KEEP住,咁我就可以做個開心媽媽, 仲要ENJOY 呢10個月無M 的感覺, HAHAHA

明天下午去TKO 醫院做第1次產檢

到時知會否再UPDATE 返個預產期, 唔知駛唔駛改期, 係計多左定計少左?

~~~

BAD NEWS....

好好人秘書下星期去旅行

佢個BOSS要我坐過去頂位,我真係超唔想去呀....

我TEAM 無左BOSS, 就失勢俾人蝦.....我SENIOR 又唔救我唔幫我.....

懷孕6w

2015.5.3-5.8

呢個week 感覺無咁攰, 無咁需要訓覺

之前.....我自己一個食lunch , 我一定返一返宿舍乞半個鐘, 唔係ge 話....成個下午無晒精神返工

說來算係好彩~boss resign 左無耐, 我依家係無皇管狀態, 所以lunch 食幾耐先返, 有人留意都無人會話我

~~~

同事仲未知...我講左俾應該要知的人知, 包括1個HR(因為要問產檢和產假問題), 仲有1個part 開的秘書(咁我呢排請咁多假, 單聲好d ge)

反而我Senior都仲未知, 而平時同我食開飯的同事都仲未估到, 但佢見我做咩食飯食咁少? 又唔食某d 野(生冷野)?又唔係成日同佢食?(我一直呃佢話感冒, 食緊中藥未好)

我都唔知點講好, 話自己病, 無理由病幾個月都未好返ma

希望呢段時間快d 過, 陀得穩la

~~~

雖然有睇中醫, 中醫讚我無嘔, 好叻女

我都周圍搵資料,原來孕吐可以係呢個week 或更後發生, 所以我都唔知係安胎藥的功效, 還是我未發出來

同埋呢一排....開始食野.....未食都好似好頂胃....但俾我食又食得落

星期日個日仲食左2碗牛奶燉花膠,好味道~~

初期症狀都不外乎想作嘔, 轉變胃口(我係由本身好愛甜野, 依家突然勁想食喊野), 胸脹, 有胃氣/放屁, 好易攰, 郁下都好大汗,三角位間中陰陰痛幾下

依家最希望下星期和再下多星期去照個時, 見到Cheers健康咁成長, 呢段期間唔好流啡有血有痛

我知呢幾個week 好關鍵, 我地同cheers 一定要捱過, 俾我地緣做你今世的父母

懷孕5w

踏入5W(2015.4.26-5.1)

其實個人都攰....好想煮餐飯俾老公食, 但自己體力都應付唔到

好彩睇左中醫安胎, 所以變相晚上訓得好好, 一覺到天光

之前唔知咩事....真係夜晚晚眼光光GA(好多JM 都係咁講, 搞到個人好攰)

但係我就無.....飲左中藥, 一覺到天光, 個人仲要好開心, 有時仲忘記左自己粗身大細.....

差D 拎左重野, 舉高手拎野同行快左....(當然....係即時記起, 停左自己舉動, 轉返慢MODE)

之前....諗住再調理下自己身體, 買左勁多藥材過來澳門

但醫師唔俾我食, 佢叫我俾我媽, 因為食安胎藥都有個D, 再食就太補, 同埋湯水都唔洗飲, 長水唔長胎GA

花膠都叫我好食呢幾個月好食....3個月後再食, 塞乳線, 餵唔到奶自己又谷奶就好辛苦

咁好LA....浸定花膠, 得閒煲LA

中醫師只叫我寒涼野生冷野一定要戒, 菜只得幾款可食, 太補的依家未係時候, 簡單飲食, 平平淡淡, 其實10個月好快過喎

不過好彩我平時都訓練有數, 因我平時又係少食涼野又唔太食凍野.....食日本餐除外(加上幾個月前又切親手指戒過口一排)

咁依家頭幾個月...清淡少少....基本上都唔太大問題

因為幾日公眾假期, 所以要提早返香港睇左中醫(醫師連5月2都休埋, 所以即係最遲就係今日, 4月30 要去搵佢一次)

跟住又趕返澳門, 因為朋友5月1日晚上一早就約左我地食飯, 咁又未咁快公開得

所以我趕來趕去....返香港睇下中醫就返澳門

攰就唔算太攰, 係船飛貴je....

但為左Cheers~無得計ge~

~~~

因為澳門宿舍, 本身業主的櫃.....怪怪,一個係一格格無得掛衫

有得掛GE 係我地房, 但就上下格, 我本身係掛下格....但依家唔方便

所以同老公去左雜貨鋪買左呢隻布衣櫃返來

老公砌左俾我用~~大家又多左空間放衫^^

懷孕4w尾

因為係澳門工作, 要夾到星期五和六先返到香港的醫院登記排床位

但好驚返到香港, 真係去普通診所驗個時, 原來係自己搞錯, 咁咪超樣衰

(不過我M 真係無來, 其實我都知....)

所以我自己又再買多支去驗(哈哈, 傻瓜, 又買同一隻牌子....但還是這隻傳統的棒棒, 係最可信)

驗完.....的確真係.....

今次應該係堅, 呢隻係傳統試紙, 唔係上次個支電子野

~~~

2015.04.24

咁等到星期五晚提早放工, 返香港

好彩醫生幫我都驗到BINGO.....跟住寫埋証明俾我, 

呼~~鬆一口氣!!

因為要借宿係娘家, 所以要話俾娘家家人知, 不過大家沒有太大感覺....

但開始做皇太后, 想拎咩想做咩, 有人幫手, 唔駛自己來

haha^^

~~~

2015.04.25

第二朝就去左將軍澳醫院做登記, 因為呢間醫院有產科無產房

所以可以安排過來做產檢, 生產就係去聯合

 (唔知點解, 坐係度等登記...突然我有d 感動好想喊....

個下係度諗人地登記入院係唔開心, 我係開心因為要帶Cheers 來呢個世上....所以眼濕了)

登記完就去睇中醫安胎

算好好彩~~試左第2個月就中

醫師之前把我脈, 叫我返去自己試多次, 唔好食中藥住

估唔到依家真係俾佢開口中, 依家返來安胎

睇中醫順手睇埋個感冒....成日打"乞次" 又流鼻水.....唔知係咪我呢排成日熱熱地, 入到室內又嘆冷氣, 一冷一熱呢?

我最怕影響到Cheers baby