懷孕19w

自懷孕後, 的確我覺得老公係比以前更關心我

有D 人話唔慣, 唔見個衰佬以前對自己咁好

我就無咩呢D 感覺, 可能平時對比依家, 老公都對我好好

相反....我自己都唔係無時無刻對佢好

又何苦要求對方咁多?

佢依家唔對你好, 仲對邊個好丫? 為左個BB...我覺得女人好大犠牲

又變肥又走樣又呢度個度唔舒服....最後仲10級痛+開刀

所以老公依家對我好, 我覺得係福份, 因為佢知我辛苦

佢對我好, 係雙倍, 因為Cheers 係肚入邊, 所以2份關心

佢依家...成日都黏住我陪住我, 驚我有需要搵人幫手, 佢唔係我身邊

我都好多謝佢, 就係佢成日陪我, so far....我都無產前抑鬱症

仲係做緊開心的媽mi

聽人講孕婦成日發夢, 我唔算係多(本身都唔多), 不過如果日頭有想過, 就好易係晚上發夢見到

不過尤其陀左Cheers 更信緣份, 相信所有野係整定

好似想book 一個醫生做產檢同照結構, 明明book左, 但有另一個更好的又俾我book 到

我就取消之前個booking

我直覺覺得呢個醫生與我同Cheers無緣

所以所有事, 來得自然就任佢發生

不強求, 也不去想太多

乞人憎的皮囊炎, 又再一次出現....

可能有第1次好易有第2第3次....唉....

依家陀住Cheers, 我真係好唔想食藥同搽藥膏, 好怕影響到佢

但....生係敏感部位, 又痕又痛,又怕發大....

真係要正視, 所以迫於無耐, 去睇下醫生

醫生都唔建議我食藥, 唯有搽藥膏

好彩地....幾日後有好轉, 再搽多幾日就消腫晒

懷孕18w

奶粉商D 講座....極之難抽到

(有D MAMA....係咩都抽, 為左要禮物, 但我身在澳門只能揀星期六日去上, 仲要同咁多MAMA 爭, 上到其中一個都算LA...)

今日好彩俾我抽到呢個

有3個環節:按摩,孕婦營養同嬰兒護理

跟住有陪月EE 係另一個廳教換片, 掃風同餵人奶姿勢

都幾實用

聽完講座, 係門口實有D 人係度叫你入會

個D 會...就係唔理有無入, 你俾資料佢加簽埋名, 佢之後幫你填晒

跟住就俾紗巾你, 呢D 紗巾...我依家都儲到12 條.....

慳返一筆

有人推介一本書<<媽媽, 我記得你>>

終於的起心肝去睇, 讀俾Cheers 聽, 點知自己都喊左出來

其實本書無想像中咁好睇...我以為成篇都係講出世的小朋友憶述返胎內記憶

原來唔係....係幾句, 跟住再加作者的描述

所以之後再讀都無喊lu

但我喊的原因係我感動, 因為我同老公有Cheers 的出現, 感覺好圓滿, 好有家的感覺

呢排食左好多野, 牛肉, 豆腐花個D....放上FB, 話Cheers 食左有反應, 有胎動踢我

點知居然俾人話我呢樣果樣最好唔好食, 其實陀b 啫...唔係坐監, 唔駛戒到咁清?

唔食係咪一定無事先? 雖然Cheers 未出世, 我都唔敢保証什麼, 但我食到...我就一定會為我做過的負責

依家d 人問我幾多w?我真係要望返日曆or apps.....過左3個月, 無成日記住自己第幾w...

去做產檢....驗到有蛋白尿

好擔心!!!係咪琴晚飲左阿媽2碗花膠靚湯先係咁? 平時都唔係咁.....

要留小便觀察, 希望無事, 有事我都唔知會點...平時聽驗到糖尿多....蛋白尿好似網上無咩網友寫

講起Cheers 的衫仔, 玩具....Cheers 居然俾反應我

係佢真係識聽丫, 定係咁啱?? 好奇妙呀~

同澳門媽媽聚會, 佢地生第2胎, 佢地好大膽, 會食芒果, 西瓜, 榴槤同飲酒

佢地話餵人奶都仲要戒, 依家反而唔駛點戒喎

所以同佢地食野, 都食左少少芒果同西瓜

之後同fd 食buffet , 偷偷食左榴槤雪糕