唔想就唔好去夾硬來

琴晚一個人, 所以去了Pacific coffee 個度睇書<<讀人>>

這本書係舊同事推介
要讀一個人, 要客觀
客觀的大前提係自己唔好有情緒影響

"發現自己的舉止無法如常態般氣定神閒，就表示你被“需求”如役而不能用頭腦讀人"

"別在肌餓時購物"

書入面睇中呢2句,啟發我就係唔想就唔好去夾硬來
有一個親友, 令我有種透不過氣的感覺
基本上, 我好想去逃避去見到佢, 唔想同佢講野,因為怕俾佢話
唔知點解...我唔識去面對佢

我知身邊的人為我們的關係著急,
好想我們多見面去化解呢個恩怨
而知情的朋友, 都勸我要面對, 遲下會無事

我琴晚睇左呢本書, 突然叮一聲....
閃過了一種感覺係....
我唔需要刻意去討好呢位親友,好像 "別在肌餓時購物"同樣道理
我知我現在去評論佢,一定會不客觀,因為我不是"如常態般氣定神閒"
而我可以做的是: 什麼都唔好做
所以我以後唔會再因為身邊人著急想我們和好
而再勉強自己去惡補關係
因為佢不願
我也不見得好情願


沒必要令自己唔開心
沒必要令自己透不過氣
沒必要去勉強自己
沒必要去想這個人(無佢, 世界仍在轉,我還是好好生活著)

沒有這個人,我還是我
所以我決定唔想就唔好夾硬來

渴望的將來的生活係點?

渴望的將來的生活係點?

問起這個話題, 我真係唔識回答
細個一定會諗大個要有車有屋有錢有份好工
係無想過有個家....

出來做野
認識了第一個男朋友
(都有講過結婚, 但個時拍拖拍到好慘,成日嘈交嗌分手)
所以未來的生活???
未真係想過究竟係點
因我經常都同自己講:無左邊個係唔會死
所以一個人係可以生存到

或者係未到果個時候,未去諗有關的問題
直至遇到我老公....拍左唔知幾耐
我地想結婚
一切都好順利....我地到依家結左婚

(題外話, 最近....睇左TVB 個套沒女大翻身
其實有少少係要警愓自己
其中有一個叫CAT, 佢為奉承其他人, 放下自己
要做乖女, 做個好家姐
人地講就要做, 只會SAY YES ,但原來自己好辛苦係唔知
咁樣會無左自己)

然後老公前幾晚問我:你想將來點樣??
這個都係一個好問題...而確實我無想過

而眼見其他已婚朋友都開始有仔女
我同老公都好恨
不過當然要買左樓先LA
之後有能力希望可以生到2個
而我做全職媽媽定出去做野請個工人....我諗依家都係太早去諗
確實係要睇到時老公個賺錢能力
因為我都唔想佢辛苦(我又係為左人去諗)

我都唔知
將來....唔敢諗太多, 怕期望越高失望越高
人大了...就很怕痛
怕自己心痛.......

工作+家庭

前幾日....跟朋友閒談下
我發現我自己原來係出來做野呢10年左右....
我原來做過12間公司(唔計幾份PART TIME....)
即代表我都轉過好多次工

有2年...好記得....一年轉3份工
好好彩地....做的係大公司, 講個名出來, 大家都知係咩機構咩公司
因為入到大公司的緣故,或者就係咁....所以都容易去見成其他工

其實我好想安定去做一份工
成日眼見朋友D 工做3年或上
我就.....最長個份係2年半
好似坐唔定咁

細個....容忍力我真係比較少....
郁D 唔滿意個同事,個BOSS...甚至係客人
我就想辭職
希望轉去下一份, 就避到果D人
但轉落轉去都還是撞到呢D人
所以現在要下定決心去係一份工留耐少少....
(當俾試驗自己~)

而因為老公過左澳門, 我又身痕
一下子就話走過去澳門跟住老公做野
在某些朋友眼中, 我都算叻
因為我話搵就搵到係澳門的工作
而且過程都係順利.....(由計劃去過,再SEND CV....直接過來INTERVIEW,花左半個月)
可以話係之前的工作經驗, 有related 卦
亦好彩係之前都想轉型,轉做類似的行業
所以澳門呢度就啱晒

下一份工.....要返香港
琴日同老公傾....話我返香港的工作去向
老公話:你仲想做呀?做少奶奶la

我開心咖....真係由個心個度甜到笑出來
做少奶奶呢份工其實會有d 悶, 但到時我有我地的bb 陪住, 應該幾忙
等待呢一天來臨!!!

ALS

呢一排真係不停追究竟邊個藝人明星淋冰水落自己個身上?

ALS 有幾多人明係咩來? (肌萎縮性側索硬化症（ALS），又稱運動神經細胞疾病（MND），目前沒有有效的治療方法。)

俾人挑機唔輸得, 所以玩一餐再挑下一個機?

我唔算係一個大好人
但如果讓我知道捐錢的目的同埋幫到邊類人
我盡我能量, 我都希望幫下手
尤其係那些突發的天災

而今次, 望到網上內容.....寫這種病的人係....
全身肌肉萎縮，由指頭漫延全身，直至肺腑、喉嚨及舌頭都癱瘓。不能動、不能說、不能吃，連呼吸都需依賴儀器，神智和感覺卻保持清晰。

暫時還未有病去醫治他們

我覺得我都應該行動下

所以問過老公, 老公都同意

我地係聯名戶口捐1000蚊出來俾ALS 病人

自己親手打埋封信, 寫低捐錢目的,就一併寄出

但願病患者振作、堅強和開心過每一天

也祝願身邊朋友要多注意自己和家人身體,因為唔係樣樣野係必然

用時間用行動証明一切

永遠不需要向別人解釋,因為喜歡你的人不需要,不喜歡你的人不會相信

活到呢一刻, 才明白這個道理
為何想法如此轉變, 係因為前幾個月跟家人吵左一大鑊

吵架係傷感情
亦因此令我覺得....最愛我的家人都唔明白我
(成日想解釋,因為我一直以為我肯講他們一定會支持)
但原來.....我太天真
心是很痛,奈何不可改變是關係
所以永遠講唔明﹕、解釋唔明的....我一反駁, 家人就會與我更激烈反駁

我當然明白家人是關心我著緊我
而從小到大,我都算懂事的一個(我爸爸認為係, 所以有時會跟我討論某些大人問題)
而為著我自己將來
因為無人幫助下, 當然係自己的意願行先
我再唔可以顧慮別人的想法太多
因為我都要量力而為

每每一回想起幾個月前的吵架, 我就眼濕濕了
我也不想這樣
但這種感覺令我實在心酸心痛
所以我決定....唔再同家人吵
收埋係心入面,敷衍回應下....
或者唔傷大家感情

用時間用行動去証明一切
這樣還來得實際

狂蜂浪蝶

其實論樣貎,我唔係一個靚女,
不過....有朋友話我就係對人真
我自己就覺得....我會主動去識朋友仔
而男性同女性朋友的比例, 我較容易識到男性朋友,因為同男性傾計, 感覺舒服好多,唔會太多隱瞞,又唔會話太多胡思亂想(因為他們思想較為理智直接)

可能就係以上各項.....引到好多狂蜂浪蝶飛來我身邊
不過我個d狂蜂浪蝶(即對我好似特別好,有明顯動作表示個d)10個有8個都係大過我10年
[當然....我ex 同我老公不是....所以係10個裡面,2個係後生....10個有8個老<---係大概的意思]

除左我有狂蜂浪蝶
琴晚呀...同老公去跑步, 突然我問起佢
佢都話佢以前有....(我唔問佢唔講>.<)
不過哈哈~~~佢不為所動, 最終揀左我
YEAH!!

(其實我覺得我老公真係能夠吸引到異性
感覺佢同我一樣, 又係鍾意識朋友, 對人都真)

有幾多狂蜂浪蝶....我相信我同老公都對對方好夠信心
唔知點去形容那種感覺
但我知我同老公都唔係個D得把口講的人
係會用行動証明一切的人

每天愛你多一些 - 續集

無想過呢個topic仲會寫多一篇日記

事源係琴晚,老公刷牙比我早
佢問我:刷左牙未呀?我幫你"支"牙膏
當然我好開心~佢都為我做呢個動作

而最surprise 係....佢知我要濕左牙刷先"支"牙膏
(而我老公係鍾意"支"好,將牙刷再濕少少水,
所以呢一排幫佢"支"牙膏,都係乾身"支"係上面,等佢自己刷個時先濕牙刷
因為有時我"支"完佢唔係即時刷牙)

從來我都覺得男人粗心大意,有時係會好好記性,但有時就....
都唔緊要, 我都明白!我都唔係咩都記得
但"支"牙膏呢個動作
仲要係我地好少好似睇戲的情節.....一齊刷牙
(除非係去旅行, 有2個洗手盆or 趕時間先一齊刷)

但估唔到....佢知我有個同佢唔同的習慣,仲要係咁細微....
細微到....係濕水先定濕水後先"支"牙膏
原來佢都記得

找到一個將你所有的東西都記入腦的人
是相當的幸福的事
多謝你, 老公

介意

在澳門搭巴士, 可能係冷氣開太大, 又或是門口附近或對住的位置
總有些巴士的櫈係有水滴下來

當然, 我見到係唔會坐,就算抹左, 都看似會再滴下來咁

但好神奇地.....見過有2次,我望住那些乘客上車, 見到張櫈係濕, 但車上係仲有位, 唔係只得呢個位

那些乘客可以若無其視,抹都唔駛抹張櫈, 就咁坐左落去

究竟係個乘客無見到張櫈濕? 定係佢地諗住條褲返屋企會駛, 濕都可以照坐??

真係好唔明....

但呢個奇觀....令我知道介意,對於不同的人, 個程度可以去到邊度?

(假設對方係知張櫈係濕都照坐吧)

同一件事, 我會好介意,但其他人會理都唔理,唔當成一回事

究竟係我的問題? 還是係別人的問題?

我諗無答案, 唔需要答案

但要明白一點:不應將自己角度放在別人身上看