R & M 愛情故事 Part 3

第1次約會完左, 其實未到第2次約會(相距2個月)

我同鏗期間都有講過下電話....

同佢SMS....其實幾sweet , 唔知點解

個時都無諗...係對唔住ex

但個時...其實都臨近想分手....因為一直睇到ex 越來越多缺點

最後2次, 簡直係無心再一齊返, 但佢就死都要挽留段感情

上次約會, 都唔駛同ex 交代...

可想而知, 個關係去到咩地步

最終突然有一日...

我行行下街, 無被其他野去擾亂的情況下

我真係feel 到自己死心, 我決定真係決定要同佢分手

打個電話俾ex, ex 居然話: 分手夠12次, 西餅都夠一打, 好la, 咁分手

跟住我個心空了....

咩話??我講左12次??

點解平時你咩都扮無記性, 你要記住12次??

呢條友仔真係唔要得....

分左當然係唔慣, 有keep 住聯絡, 但就變左普通朋友傾電話

ex 仲話:好訓左, 精神左, 做野仲無俾人鬧

呢d 風涼說話唔知係咪特登講我知(因以前我係成日同ex 講電話, 講到好夜...)

咁好la....依家無人煩到你, 咪好lor

同埋之前都聽聞公司有女同事想識你, 我都覺得你地係似有路, 我都唔想做第3者
(佢一直唔認, 但事後....還是我直覺準, 佢地真係一齊左,
況且有人話同公司拍拖, 對方明你做d 咩....
咁我諗其他人唔同工種唔駛拍拖結婚做夫妻la, 費話!!!)

~~~
講返正題la...
咁分左手, 無咩野ge....都有喊, 都有唔慣, 差唔多晚晚都捉住fd 陪我煲電話粥

咁....好正常, 都同鏗講下我近況
我: 唔開心呀~
鏗: 咩事?
我: 我分左手....
鏗: 咁約出來食飯

咁約左一日...
但未食之前講個小插曲俾大家知
我同我契妹, 去左玩塔羅
塔羅占到我只要跟那個對象暗示, 果個對象就會行動
個時無想過係阿鏗, 係事後先諗起
但呢個塔羅係講電話之後, 即我唔係跟塔羅的意思去做, 係隨心

~~~
咁到第2次約會
鏗帶我去佢以前成日去開那間cafe
老闆娘有問阿鏗: 呢個你女朋友?
鏗話: 唔知呢~

今次因為分左手, 我都打扮過才出街
著左牛仔短裙和boot
我最煞食應該係條美腿
而俾阿鏗個印象應該都幾好....因為佢又係咁望到我實一實....眼都唔眨..., 同上次係和民一樣

叫drinks 個時, 阿鏗推介一杯叫"炒面"的東西, 原來係妙趣曲奇特飲, 但menu 打錯字.....最後俾佢同班fd 叫做炒面
咁我唔知叫乜好, 等佢叫左, 我望下, 我又覺得幾ok
佢叫我試啖, 跟住佢又接住飲返個杯
反正我未叫, 無理由咁樣間接接吻咖....
就落order 叫多杯, 我先要左佢叫個杯
食飯傾計, 都好開心, 我本身都唔想出來, 因為其實我無乜錢成日出去食飯
但阿鏗好好, 佢話佢投資有錢賺, 佢請我喎
係咪真係賺左, 我無深究, 但至少....唔係AA制, 大方的男人,感覺都一定受落過同ex一齊

好記得....鏗個衰佬....
專登坐近我隔離
夾硬要除我副眼鏡, 睇下我唔戴眼鏡係咩樣
其實...我800幾度近視加散光, 唔戴眼鏡, 我盲咁制呀....
但佢夾硬除, 我護住....手仔有掂到....
不過未有火花
但到依家都好記得....

食完飯就走人....佢送我去巴士站, 我望都無回頭望就上車
去到半路中途, 鏗好關心咁問我去到邊?
(鏗從來都係咁細心, 由同佢一齊到之後, 佢唔送我返屋企, 但佢會預計到我幾時落車, 跟住打俾我問我去邊!)
呢個係要讚!!

R & M 愛情故事 Part 2

自收樓後, 都有幾個電話同阿鏗傾過

但只係限於...公事上, 傾完就收線

直至到1個月後, 實際係幾多號, 我都唔太記得.....

只係記得12月21 日收樓識左佢...佢好似1月2X 日左右打俾我

個時係返緊工, 突然有個電話打來

我聽左, 佢居然主動話約我食飯

因為其實我好鍾意識朋友, 所以食飯梗係無所謂LA

阿鏗打來話去完上海旅行, 想約我食晚飯,
我食咩無所謂, 但佢聲明唔食:小籠包 & 蟹
哈哈, 咁得意ge~ ( 佢話小籠包因為啱啱去完上海~食左好多食到厭喎, 蟹就自小唔鍾意食)

好la~~~近近地, 約去九龍灣食和民

~~~
其實....佢個樣好普通, 普通到...我到左和民門口
都唔記得左佢係乜野樣(咁啱門口又多人等位)
咁唯有.....扮晒啱啱到, 打俾佢, 然後打俾佢, 睇下邊個接電話, 有反應講到佢企邊, 咪果個lor
hahaha^^

最後相認了, 入去食dinner

第一次正式約會.....
因我仲有拍拖...
我諗住識朋友...求其著牛記笠記算.....
(諗返都好失禮, 第一印象唔知有無被扣分)

咁因為阿鏗去完上海, 所以佢俾左電話掛繩手信俾我
係膠的鞋仔, 細細對....仲要係紫色
阿鏗一手拎出來話:丫, 拎錯了紙巾, 另一邊先係
我就多謝佢, 話佢知好鍾意紫色
佢話其實佢求其拎一份來送俾我
(可能當初佢無意, 不過我之後....整唔見左....同返佢一齊, 我同佢講, 佢居然仲有, 佢又送多左一個俾我)

全程食飯, 我都好唔自然....
因為阿鏗望到我實一實.....眼都唔眨個款...
我就成日借d 椅望下其他人, 望下枱食下野
但就係唔明佢做咩目不轉睛.....咁望住我(係初頭幾次....依家唔係咁la)

對話內容唔係好記得, 但好記得...無咩點講過大家現在近況係咪單身定拍拖
我有點故意隱瞞, 因為我都想搵過比ex (當時男友)更好的人
所以凡事留一線

而今次食飯, 撞正ex 唔得閒陪我
所以我完全無申報和交帶過我自己去左邊, 同咩人一齊

食飯~~由阿鏗請~
gentlement!!!
(我ex....唔問返你借算偷笑)

食完飯, 佢話同路, 同我搭左幾個站地鐵
第一次正式約會, 無咩特別!!或者對阿鏗來講特別卦....但我無咩印象....因為係無諗過發展

越接近真相, 越覺得人性醜惡

好唔明, 點解朋友要跟我講大話?

這個其實....係由工作關係認識的朋友
大家已經無做果間公司, 有KEEP 住聯絡

話說上個月....我係澳門的宿舍就快租約完..... 要搵另一個新租盤
咁2間宿舍有一個重叠時期, 即我同時租2間屋
見有房可以SPARE 出來, 就招呼下朋友

咁朋友C 就話想同老公一齊來, 本身諗住過來玩下食下即日來回
收到我msg, 所以就即刻回覆我, 決定過來3日2夜

招呼左佢地過來, 最後一日有見過面, 佢地話俾我知廁所水箱突然無水
佢地要用水筒裝水喉水去沖廁
咁我地都唔好意思, 咪落樓下問下看更停廁水停到幾時?

點知看更話: 廁所水係用食水, 係同一條喉, 你水喉有無水丫?
咁答案梗係有水la...唔係朋友點沖廁
看更就話: 咁你有無關左水箱個制? 如果無就一定係水箱有事, 你搵師傅來睇下la

我地覺得好奇怪....
晚上等朋友返香港, 再上單位望
其實我老公唔太熟水箱, 不過我地半信看更的情況下
我問朋友C: 你地會唔會有掂過廁所水制? 樓下看更話無停廁水喎
朋友C 話: 無呀, 但無理由喎, 我地搭Lift 時, 鄰居都有問我地, 出左lift 個鄰居仲問個看更幾時有返廁水?
但我追問: 咁有無聽到看更點答個鄰居?
朋友C 話: 無喎, 我地行左出去啦
朋友C 繼續話: 一係你去隔離拍門問下隔離鄰居, 一係打開水箱望下
我就話: 唔la, 我老公對水箱唔在行, 我再睇下點la

然後....我地唯有打開水箱蓋望下
見到水箱有條鏈鬆左
(其實水箱的原理係當你沖廁=拉下水制,
咁塞會提起, 有水落馬桶就可以沖廁, 隔離有個浮波,
咁浮波可以feel 到水位....到水箱full, 浮波連住個塞, 會塞住個入水位)
而鬆左個條鏈就係連住呢D 組件, 咁鬆左條鏈, 咪自然入唔到水
我老公伸手入水箱扣返條鏈, 咁就解決左件事
其實條鏈鬆左係間中會發生, 最常見係一個沖完廁, 下一個好心急不停再沖廁
我係舊宿舍試過一次
所以今次, 看更咁堅決話廁所水同食水同一條喉, 咁我唯有見老公打開水箱望下係咪同一樣事情發生

~~~
事情如今, 我真係好唔開心....
 我上網求証過,又同同事傾開....澳門係無咸水, 全部係自來水供應(即沖廁係食水)

其實整爛左野, 或者同我講咩都唔知, 唔知點解無水, 咁咪算
點解仲要話有鄰居咁樣問?

所以....這個朋友...
我想我都不能再當佢係我朋友
不誠實又作大話
他老公又係做管理處, 跟我們以前的職業一樣,
所以技巧上佢地係識玩, 識得點去講今次的大話,
但實際係有錯唔認, 呢個朋友...太醜惡

R & M 愛情故事 Part 1

最近係一個網站, 睇到有人分享佢地的愛情故事
我追晒所有的文章,因為睇呢D 咁美好咁Sweet 的事,
的確係增加自己的正能量
而同時, 我都諗返起自己同老公的愛情故事

趁係公司有時間, 分享下我同我老公的愛情故事俾你地知
希望唔會悶親大家

~~~
由相識的第一日講起
2006年12月21日
點解會咁記得呢一日?

其實...12月19-22日....4日裡面, 其實我係放2.5 日假
果時我係做會所, 返shift, 所以提早放聖誕假, 之後聖誕假期就日日返工
但突然....我surpervisor 要我入房搵佢,
supervisor問我: "12月19至22 號, 你放2日半假, 但因為公司派我去收樓, 但聖誕節前好多野要做, 所以睇下你想唔想, 我安排你過去代我收樓?"

我由細到大, 其實都好肯學野, 因為覺得學得多, 自己得益多
同埋....放假要返工, 係有得補錢, 1.5 pay~~假又無得放返....我已經忘記左

咁我就應承左supervisor果幾日就去收樓la
但我無上training 乜都唔識喎
咁同事上左training 就俾晒d notes 我, 但....因為無經驗, 所以自然係一頭霧水, 希望到現場, 有人教路,到時先算

~~~
2006 年12月19-20日係收樓的Day 1 & 2

我識左2個男同事
其中一個年紀比較大dd....
知佢無女朋友, 所以相當口花
因為要有人係office, 所以lunch 我同其中一位男同事出去食
咁年紀大dd果個就話: 好la~ 你同佢食lunch, 我要同你食dinner ga
我個時呆左....唔識應答
到晚上收工, 年紀大dd 個位男同事同我一齊走, 佢就不停問我:係咪食dinner 啫?
我諗左一陣....其實食餐飯無壞啫, 我都想識多d 人, 工作上又有幫助

就係咁, 通知左ex 一聲, 我就去食飯
還記得個餐係對方請, 好彩佢請咋, 因為我個時人工得幾千....
但佢又點生蠔, 又叫紅酒....個時我廿幾歲女, 第一次食咁豪(我ex 從來無帶過我食好野貴野, 家人都係慳錢.....所以呢一餐, 應該係我有生以內第一餐最豪)
呢一餐...其實我都好唔慣....
因為第一日識就食飯
個時, 我仲記得...我食完餐飯, 打左好幾十次俾ex...都打唔到
我知佢嬲我同第二個男仔食飯
其實某程度上, 佢唔係一個好男朋友...
因為以前, 佢去夜街, 我打個電話俾佢, 佢會敷衍我, 然後收線
到我去夜街, 佢會不停打俾我問我幾時返屋企?
我真係唔明....只有佢管得我, 煩得我, 我唔可以擔心佢, 問佢幾時返屋企嗎?
難道佢覺得佢係男就去夜街係小事? 女就唔得? 咁佢又無一次來接我咖喎, 佢接我走, 咪唔駛咁擔心lor (呢個佢真係做得好差, 因為我老公會自然咁做, 唔介意我出街, 我有需要佢會來接我走)

講返正題先
收樓day 2

其實呢2日都唔多收樓booking...小貓三兩隻....(因為係收樓階段的尾聲)
所以我學的實習的都唔係太多
到差唔多臨收工,發生2個問題
就係明天有個booking, 個客上午來收樓
(1) 明天得我一個, 我仲係未識收樓, 即刻通知個度的最高話事人
佢一撥電話, 就幫我call 到一個同事明天來幫手...一個上午(那個就係故事的男主角)

(2)因為明天人客來收樓,事先要準備定單位的remote 同入伙小禮物
點知....大家執野時發覺, 個單位remote 唔見左, 唔知去左邊
但我趕住放工, 因為要回家過冬做節
最後....2位超好人的同事, 就叫我就先, 佢地幫我搵
搵唔搵到, 到時都打俾我, 再教我點解決
(最後搵唔到...咁就叫我同客人講, remark 係個list 到, 事後會有職員幫佢)

~~~
2006年12月21日

返到公司換左衫, 等另一個同事來打救我
突然有個大大件...樣唔係突出又唔係靚仔的男仔來
大家互相自我介紹後....我仲叫佢可以係果間房換衫
點知...佢仲熟過我, 因為佢之前係度收過樓
咁我就話佢知琴日發現左一件事, 唔見左個remote

個客又咁橋...改左個收樓booking 去下午
咁就有大把時間俾我地再去store room 搵多一次個remote
咁佢就同我講:不如我係度搵, 你返去先(因為始終收樓office 要一個人聽電話)
咁但係我有咩事點搵到你??
佢就俾左我手提我, 而個時佢就話我知, 唔係呢個亨, 係金堅果個鏗

(個時係度諗: 丫, 呢個男仔都幾好喎, 咁肯負責任?其實佢可以求其話唔見左mark 低咪得lor
但佢居然去搵...仲要最後, 係搵得返個remote, 咁先最勁!!)

就係咁, 我地交換左電話
係呢幾日收樓...我有咩事唔識,要求救求, 我會打晒俾呢3位同事
而最幫到我, 即時答到我, 或最快答到我....係阿鏗

阿鏗只係來幫手, 係幫一個上午, 下午佢要返自己SITE 工作
咁臨走前, 同我可以食個LUNCH
我地叫左外賣
嘩.....條友仔....居然話食半盒飯夠飽, 我同佢SHARE 半盒, 仲要加多件三文治, 搞到我好似好大食咁
不過...我好記得, 當日同佢SHARE 係免治牛肉飯
同佢食飯, 傾計...知道佢有個妹, 佢會陪佢妹跑步減肥, 一個幾錫屋企人的哥哥來喎~

個時收樓的相, 大家可以Click 去下邊fb 望下^^
係同左Day 1 & 2 個時識果2位同事影相, 偏偏無同阿鏗影....依家諗返起, 都唔太記得佢個時係點ge 樣??

https://www.facebook.com/rebeckywai/media_set?set=a.39580630545.71940.695235545&type=3

收完樓, 就各自返自己崗位
無再聯絡

~續~

愛怎能永恒?

愛情就像磨石子一樣, 或許剛撿到的時候, 你不是那麼的滿意,

但是記住人是有彈性的, 很多事情是可以改變的,

只要你有心、有勇氣, 與其到處去撿未知的石頭,

還不如好好的將自己已經擁有的石頭磨亮磨光,你開始磨了嗎?

很多人以為因為感情淡了,所以人才會變得懶惰。

錯了! 其實是人先被惰性征服,所以感情才會變淡的。

愛一個人...

要了解, 也要開解; 要道歉, 也要道謝; 要認錯, 也要改錯; 要體貼, 也要體諒;

是接受, 而不是忍受; 是寬容, 而不是縱容; 是支持, 而不是支配; 是慰問, 而不是質問;

是傾訴, 而不是控訴; 是難忘, 而不是遺忘; 是彼此交流, 而不是交代;

是為對方默默祈求, 而不是向對方諸多要求

~~~

愛怎能永恒不變?

這個可能我地上一代做得比我地更好

感覺上, 我地呢一代好似成日受唔住壓力,好易受引誘....

然後就無信心, 嘈交, 有第三者....

我初時...仲以為自己唔識拍拖

因為對上同EX....係勁嘈話要分手

EX 係好奇怪的人, 佢會將佢的缺點俾晒人睇

然後,我就會超唔鍾意, 然後就嘈分手

我同一個人一齊, 無話收唔收埋D 缺點, 只係會俾最真個面對方睇

所以....算係十分好彩的我, 第二個拍拖就遇上我老公

一拍就5年, 然後結婚...仲有幾個月...我地拍拖8周年(什麼是7年之癢???其實我地無~~)

~~~

而有些人, 覺得拍拖好過結婚

結左婚就變

某程度上, 呢個"長期"同居, 係睇到好多野

要照顧要接受要日對夜對

但暫時來講, 我同我老公都仲係好Sweet

比如說, 琴晚我係房...發出一聲撞到的聲音

我老公係廳聽左幾下, 唔知我發生咩事, 即刻跑入房問我有無事?

我當然係嚇親, 但其實我是用棍加了濕的佈在抹櫃頂, 所以發出聲音

而今朝....老公話想飲大杯咖啡

我為左陪佢, 先快步行返公司打卡,再拎埋隻杯出來, 為左俾佢飲starbucks 可以減3蚊, 打左卡, 咁我就唔駛驚遲到(因為返工係計IN & OUT)

其實為咩要行到身水身汗?

我都唔知....

不過就係呢一種感覺, 令我地呢7 年幾....依然咁sweet

結左婚, 仍然似拍拖的小情侶咁

但願睇到我呢篇日記的你們每一個

都有一個愛鍚和值得愛的人

讓愛係你們周圍繼續keep 住sweet 落去

加油呵!!

NOTE IIII

這電話不是最新款
不過....還是要跟老公的一樣款
他的...前幾個月去旅行, 整濕左壞左, 提早要換
我的...等信用卡的CASH DOLLARS 入左帳先去換^^
(之前的大交易,銀行送左好多好多CASH DOLLARS,所以電話係唔駛用錢換返來咯~)

仲記得....幾年前
我地開始用情侶手機
突然有一日....個傻佬買左部IPHONE話送俾我 , 一人一部
我勁鬧佢, 因為部電話未壞, 佢嘥錢買第2部

個時...D 同事知道, 話我老公咁好仲鬧人....
我諗下....又係喎, 其實佢係鍚我啫, 我做咩咁衰仲鬧人?

一直以來, 佢好錫我, 我又好錫佢
我知道我地係好夾得來

好彩個時我無鬧走左佢咋
唔係...我諗我無咁幸福(無憂無慮咁生活, 日日笑哈哈, 仲重要係肥左20磅....>.<)
HEHE^^