懷孕14w

做媽媽真係好偉大, 因為唔可以亂食野, 所以身體好易見到唔想見的.....
今次係爆瘡, 仲要唔係好上到粉....
唉....一連幾個位爆晒係塊面度,超樣衰
過左3個月, 我要tune 返自己唔好再食咁多薯片同熱氣野
唔可以咁放肆, 飲多d 水

好慘....我又再次發現自己流牙血...
唯有間中用下漱口水殺下菌

呢一排同事俾多左文件我去派, 不同時間俾我, 令我都分時段要離開個位走一走
都好ge~~唔好成日只係坐係個位度
而晚飯後, 都捉我老公去公園散步半個鐘
雖然係熱左d, 但無得做太劇烈運動, 散下步又2小口子傾下計, 都幾好丫
(其實我母校有個sir 佢晚晚都同太太去散步, 我覺得好sweet
我諗工作忙的我地, 都無咩幾可做呢d 野, 多數飯後係玩手機或忙呢個那個....)
~~~
終於等到老公生日
我地都藉住呢個時候同各位係fb 公開我地的喜訊--Cheers 住係我肚入面, 將會係12月尾出世

好似大家掛住恭喜, 少左同老公講生日快樂
不過我相信老公都好開心唔會呷醋ge~
因為做準爸bi 喇

我有時都會望住老公, 係度諗: 丫.....呢個人我揀左來對一世, 估唔到同佢拍拖, 結婚, 仲為佢生個bb
心入面有一種可靠的感覺, 但同時又估唔到上天會賜呢個人係我身邊

真係ga.....以前, 無想過拍咁耐拖, 會有人要, 無想過我將來係點, 更無想過會生仔, 搞掂自己先算la
所以有今日, 我覺得我係賺左, 我係收成緊
我已經好滿足
最緊要身邊的人身體健康, 平安, 開心, 我都心足
唔想再去要求什麼

因為人係有無窮無盡的慾望, 人係貪心, 但有好多野, 錢係買唔到
所以唯有提自己要去珍惜現在所有
咁比起得到那些物質還實在, 還有價值

懷孕13w

政府醫院知我會出去做T21 代替唐氏檢查, 所以就幫我T21 之後, 拎埋report 返去再見醫生

今次係第2次做政府產檢, 政府產檢真係無咩好做.....只係聽心跳同埋同你傾下計

我今次問左2次醫生, 醫生都唔肯開materna 俾我食, 醫生叫我只係均衡飲食就ok

(事後我仲俾老公話我: 邊有人咁鍾意食藥咖?

咁其實我係擔心bb 唔夠營養je, 不過以前阿媽個代都唔會搞咁多野食咁多藥去陀b)

不過呢,過左3個月, 我唔再輕落去, 食野都正常返, 重量就反超前....

重過未有之前(希望唔好肥落我度就好!!!)

同期.....我發現好多身邊的朋友、jm、同事都一齊有左

超開心呀!!!覺得大家好有緣

不過mama group 就有時會聽到唔開心的事

有d 突然bb 無左心跳, 有d 作小產, 有d 過唔到唐氏

陀bb 真係唔係易事, 要過5關斬6將

要識得令自己開心d, 因為你開心, bb 會feel 到

同時又要叫自己咩都放鬆心情, 因為好多野唔係自己能夠控制得到

因為上星期搵左陪月, 今個星期in 同決定請邊個

同男家親戚食飯後就同合心水的陪月姨姨簽約俾訂

食飯時, 都公佈埋我地的喜訊

2圍親戚不停講恭喜晒呀! (原來都幾開心)

我知我奶奶都十分開心, 係咁不停講:辛苦你

講返in 陪月, 我地in 左2個, 總算有一個啱心水

(in 同做野可能2回事, 但至少感覺應該ok, 因為另一個真係好唔掂....)

請陪月搞掂左, 煩少一樣

~~~

我叫左我媽咪買桑寄生俾我, 佢仲買埋南棗同杜仲俾我

媽咪就教我手拎一紮, 我會放落去一個袋仔($10蚊店有得買個d 裝住茶葉片個d)

拎桑寄生去洗一洗, 跟住加2-3 粒南棗(取代左落糖) 

然後放一小片杜仲, 3碗水煲作1碗, 大火水滾就轉小火, 大約煲45 分鐘左右

同時又烚埋一隻蛋, 剥殼, 放埋落去煲一陣

桑寄生係安胎, 睇中醫時, 醫師都有開俾我

南棗係好過紅棗, 係補而不燥, 杜仲就係補腰

登登~~~出邊買好貴的一碗桑寄生蛋茶, 就咁完成喇!

~~~

因為買左肚紋膏, 我都開始搽

但俾老公都多d 摸下我個肚同bb

老公一時間, 我就叫佢幫我搽下肚紋膏

哈哈, 個衰佬幾溫柔咖喎!!!

懷孕12w

正確D 來計....12W6D 之後先叫做係過左頭3個月

初時無計清楚, 以為12W1D 就係過左3個月

不過...未過3個月都好多人知我地的喜訊

自己都忍唔住開心Share~~

~~~

2015.6.15

因為擔心唐氏係政府準確程度太低同偏差高, 同埋有事先打電話(即等電話等2星期無電話打來先知係pass)

我真係唔想太大壓力日日留意個電話

政府的檢出率度係80-90%, 偏陽性係5%, 但出去私家做T21檢出率係99.x%, 偏差陽性係0.0x%(我唔知點解釋, 請睇下表)

老公見我突然唔開心, 我又係...好易受人影響, 我係mama group 個度聽d mama 講話個b 係照唐氏無事, 點知生出來有事

我就擔心....跟住同老公商量, 佢話用錢買到安心就去私家做la

我其實一直想做呢個T21 ga(同埋加上快d 知bb 係仔仔定女女呢~)不過當時覺得$6500驗一驗, 好肉赤

不過好彩老公支持, 所以我就問左好幾間診所, 希望book 返原本政府做唐氏個期(因我地2個一早已請好假, 唔想再改假)

政府的唐氏唔係唔好, 但只可講句:無事由自可

同埋睇bk...政府個度成日度到頸皮好厚, 又話高風險, 令人好擔心ga

好彩Cheers 旺....我好易找到適合的私家婦產科診所做T21 express

(問左幾間, 有d 做nifty, 孫醫生就另一日先有位, 其他就到月尾先做得

本來係bk 睇話浸會一定約到

打左去約, 跟住d mama係度討論, 原來浸會係海鮮價, 我初時都唔覺, 因為我問價錢, 佢講唔實, 原來其他mama 都係咁覺得

咁我就再打去俾另一d 醫生問, 好彩搵到鄧悅翹醫生<--之後先知佢係女醫生

因我都覺得亂....我又去St Paul 做私家產檢, 佢個度無T21 同結構做, 咁我咪係幾個地方開File....所以決定左係鄧醫生度做T21 同結構, 

然後再帶report返去St Paul覆診用)

努力search 資料下, 其實私家有好幾隻係用來驗唐氏

分別有T21, T21 Express, Verifi Plus(Prenetics), Nifty, Panorama

因為係BK 搵得最多係T21....同埋大部份診所都有得做, 咁我就唔諗其他, 

專心去搵T21 & T21 express的資料, 好多mama提示話要問清楚 T21 都有分2隻

1隻係普通T21.....SEND 去外國驗, 等2星期先知結果, T21 Express 就係香港科學園驗, 3-5 日知結果

唔止係心急問題, 其實政府唐氏要係11-13w6d 之間做, 呢個係叫早期唐氏, 會係80-90%準, 

但如果錯過左, 變左孕中期唐氏16-19w6d 先做, 就只得60-70% 準, 

有d 人呢關pass 唔到, further再去驗, 就係抽娀毛/羊水驗, 呢個係入侵性, 對胎兒唔好

所以其實我覺得做T21係有必要

孕初期照超聲波無咩野睇, 因為BB 好細, 佢依家得5.37CM.....手指2個關節左右

好鬼CUTE~~我係咁用呢個長度成日係望住傻笑, 又同老公講笑

不過醫生話bb 細左3日, 計埋之前, 佢total 細左4日

過左3個月...我決定努力谷b

Cheers 你要同我一齊加油, 食多d 吸收多d, 健康長大呀!

做T21 express好簡單係抽血就拎去化驗, 咁循例都會照下BB, 確定BB 係咪11周以上

(因BB 的DNA 係入左落媽媽的血, 要11W後先驗到染色體係咪正常)

咁$6500係T21 express的公價來, 即係產檢+ T21 Express.....咁完成晒就問下鄧醫生問題

搞掂晒等俾錢, 有埋DVD 拎, 呢個令我更確定下次都會搵鄧醫生, 我諗出邊都無咩邊間有DVD 送埋, 雖然無聲, 但都正丫~~

不過Cheers 好似比同期bb 郁得少, 我見到佢少少郁, 佢咁細粒...我基本上只望到心跳

2015.6.18

今日係做完T21 express的第3日.....我等左全日電話, 都無人打來

好心急好心急....因為放17:30, 返到去宿舍係18:00, 試下打去診所問下

因為我知診所19:00 先關門

姑娘本身話未有結果, 但好好彩, 同我講緊電話個時有FAX 到, 原來會先FAX俾醫生review 左, 跟住先打俾我

咁好彩我知有結果返左來, 不過就差醫生review, 所以拜託姑娘打俾我

呼~~~好彩係19:00 佢地關門前, 姑娘終於打俾我

姑娘話所有test 都pass, 性別你想唔想知??(我心諗梗係想la~~)

跟住姑娘就話我知係仔仔

十萬個開心呀~~~Cheers 係仔仔

梗係即刻打俾老公報喜la

好多謝上天賜俾我地第1個係仔仔

~~~

12w尾.....我開始突然流牙血, 係食完飯去左散步....返來照鏡就見到

要開始食鈣片(雖然好多人話唔關鈣片事, 但我一次又一次停食又流返牙血, 食左又無事)

跟住又開始搵定陪月, 因mama group 個邊都有人講...

又有d mama住將軍澳, 要快手d , 唔係俾人爭晒好野就無

聯絡左朋友介紹陪月公司, 好快就有feedback, 約定下星期六日interview, 咁我同時都預備定d Q&A

~~~

有點迷信....老公個清潔姐姐話唔好換床單

其實我之前係第4w 左右自己換左一次

跟住聽完就唔敢再換....依家過12w, 趁我返工, 離張床遠d

吩咐左老公去換, 順便洗埋隔層網, 咁空氣都清新d(因自有左好熱, 晚晚都要開冷氣訓)

~~~

2015.6.20

端午節係星期六, 我揀左返工, 澳門無假放.....不過亦係好多同事揀呢日做短周

少人返, 我又無野做, 梗係返工la, 咁返工先有so ma~~

放左工, 老公做完gym, 來陪我去酒店個泳池水中漫步

佢拖住我行, 驚我唔小心

行左唔知幾多個圈....不過係時候要做下運動, 唔係就變肥豬la....

懷孕11w

終於來到11W....因為過埋今W....就踏入12W, 過埋12W就過孕初期
去到stable 又舒服的孕中期
應該好多野都穩定
而我要開始準備買孕婦同BB 野

~~~

不過見媽媽GROUP 越來越多準備緊自己d 野
我寫定個list, 返hk時, 去買定先
(p.s. 最後我係買左肚紋膏, bra, 托腹帶, 孕婦褲)
crazy shopping 呀!!
先準備左我自己的先la~~遲下先買野俾Cheers bb

~~~

返香港做facial...我成3個月無做la
諗住陀穩左先返去做, 費事有咩唔小心撞到或唔做得的treatment
點知....美容師姐姐話我無咩暗瘡, 係黑頭多啫
(好出奇~~)Cheers 令我皮膚都ok

~~~

啱啱陀Cheers 個時, 抽hsbc 鈔
最近先知中左, 家人無人中, 得我一個中, 同事們都唔係人人中
我就覺得自己係好好運的一個
可能係Cheers 旺我la~帶來我好運
抵錫!!

懷孕第10w

呢個星期多了半夜紮醒的壞習慣

唔知係多夢發, 還是多野諗

不過一定唔係急尿

無訓過, 一訓醒個腦無休息過, 個腦好辛苦呀....
精神集中差d....好左呢份工自由, 早走少少返宿舍乞陣都仲得

返工唔係夠HEA....唔駛用腦...

我諗我一早人都顛

最後突然諗起....試下用聽音樂去令自己快d 訓著, 半夜醒左又聽住來訓返

試左2日, 效果幾好, 我聽3分鐘左右就想訓

除下耳筒, 就一覺訓

半夜有醒, 但望左幾點又訓得返
(其實呢一排工作上有改變, 要去頂我partner 位, 工作壓力大左??唔知關唔關事?)

半夜紮醒, 維持左幾日....
過多幾日....突然又開始晚上渴睡症, 唔夠10點就想去訓.....

有好大進步!!

訓多D 好~~~變靚媽媽, 千祈咪變熊貓呀!

我唔想陀B 陀到個樣好殘呀!(訓唔到成日紮醒個人殘好多~~)

~~~

其實呢排都有KEEP 住每星期返去睇中醫, 同去聯合上堂

但媽咪叫我唔駛專登返佢

為令佢放心, 我唔話佢知我有返香港, 但我就話老公要返一返來....拎信

咁我媽就順便煲左湯, 要我老公拎俾我飲

呢期只係一星期煮到一餐飯, 好缺湯水....其實個人都好DRY

但有咩計?
我買餸、煮飯、洗碗係要分開做....

買餸要老公陪, 因我拎唔到咁重的餸

煮飯煮完, 食完我想訓.....最近個次訓到唔知幾點, 一起身, 我個傻豬老公洗晒我D 碗
佢話唔忍心見我咁辛苦喎

我超感動 佢唔鍾意洗碗咖, 為左我, 佢居然走去洗呀

不過當然佢係話:"以後唔好成日煮"