R & M 愛情故事 Part 4

自第二次約會後, 同阿鏗有keep 住傾電話同sms
( 都慶幸我地係果個時代拍拖,
因為依家D情侶咩都興whatapps, 其實好多時親耳聽唔到對方的語氣,
談情....應該電話對話, 咁樣先正丫ma~)

仲記得有一晚, 大家sms , 發現對方仲未訓, 傾左陣電話
傾d 咩唔記得lu
但都係好sweet
第二朝, 鏗仲打俾我, 問我有無唔知醒?
哈哈.....唔熟悉我習慣的佢...又邊知其實我不嬲唔慣訓咁晏, 我係計鬧鐘要準時起身ga
不過呢個電話...其實應該都係專登打來
haha^^

~~~
跟住到我地下次約會....
好確實的日子....就唔記得, 只記得係2007年6 月
只記得係正式同阿鏗拍拖前....的幾天(係1日定2日, 還是3日前...就唔太記得)

係拍拖前呢幾日
我同阿鏗有通過電話
我曾經問過佢, 有無睇過加勒比海盜?
因為第1集我睇左, 第2集又上, 又無拖拍....無人陪我睇, 唯有周圍問下人
(同埋加上我買左朋友2張好平的換票証, 無人陪我睇, 一係就自己去睇2次戲咯...)

開口問阿鏗, 佢話我知佢已經睇左
OH....咁算LA, 我再搵其他人陪我睇LA....
點知阿鏗肯陪我去睇第2次
咁好LA~~既然係咁, 我請我請~~~
(因佢都請左我食幾餐飯, 我唔係港女, 我都請返佢睇戲, 同埋人地又睇過, 咁都肯陪我)

咁我就腳D, 揀左銅鑼灣時代UA 戲院買飛
點知阿鏗知我係佢公司附近, 佢叫我等佢, 佢放工過來同我飲杯野喎

大電視下等, 見到佢就去飲杯野傾下計
傾左咩唔記得
只記得....有隻蒼蠅係度飛....我諗住拍下張枱趕走它
阿鏗居然摸住張枱問: 哎吔, 痛唔痛呀?
真係唔知好嬲定好笑, 乜唔係應該問我痛唔痛咩??